Um Fjöruverðlaunin

Fjöruverðlaunin eru bókmenntaverðlaun kvenna á Íslandi. Þau eru veitt árlega fyrir bækur í þremur flokkum:

  • Fagurbókmenntir
  • Fræðibækur og rit almenns eðlis
  • Barna- og unglingabækur

Tilgangur Fjöruverðlaunanna er að stuðla að aukinni kynningu á ritverkum kvenna og hvetja konur í rithöfundastétt til dáða.

Félag um Fjöruverðlaunin

Félag um Fjöruverðlaunin – bókmenntaverðlaun kvenna á Íslandi, kt. 590215-0900, sér um skipulagningu verðlaunanna.

Núverandi stjórn verðlaunanna var kosin á aðalfundi 29. september 2016. Formaður félagsins er Brynhildur Heiðar- og Ómarsdóttir. Með henni í stjórn eru Ásbjörg Una Björnsdóttir,  Guðrún Birna Eiríksdóttir, Ingibjörg Valsdóttir og Lára Jónsdóttir. Skoðunarmenn reikninga eru Védís Skarphéðinsdóttir og Halldóra Sigurdórsdóttir.

Ingibjörg Valsdóttir er óvirk í stjórn 2016-2017 skv. starfsreglum stjórnar (sjá fyrir neðan).

Hafið samband í netfang bokmenntaverdlaunkvenna[hjá]gmail.com.

Starfsreglur stjórnar

Trúverðugleiki Fjöruverðlaunanna hvílir á því að störf stjórnar séu hafin yfir allan vafa. Ætlast er til að stjórn kynni sér og fari eftir þessum starfsreglum.

  1. Stjórn Fjöruverðlaun er skipuð á aðalfundi. Í stjórn sitja 5 konur sem fá kosningu til þriggja ára í senn og skipta með sér ólaunuðum verkum.
  2. Stjórn fundar eftir hentugleikum, og hefur samband sín í milli á vefpósti verðlaunanna eða á lokuðum hóp á samfélagsmiðlum.
  3. Ritari skráir fundargerð og varðveitir á dropboxi. Gjaldkeri sækir um styrki, sér um ársuppgjör, og heldur til haga kvittunum. Stjórn skipar tengilið sem sér um samskipti við dómnefndir. Allur póstur fari í gegnum netfang Fjöruverðlaunanna.
  4. Starfsárið miðast við afhendingu verðlauna. Nýtt starfsár hefst þegar verðlaun hafa verið veitt.
  5. Eigi stjórnarkona hlutdeild í bók sem lögð verður fram til Fjöruverðlaunanna ber henni að víkja úr stjórn á því starfsári.
  6. Öll skjöl, ályktanir, upplýsingar um tilnefndar bækur, dómnefndarkonur og annað sem varðar verðlaunin skal vista á dropboxhólfi verðlaunanna með skipulögðum hætti.
  7. Stjórnarkonur skulu ekki vera fastir starfsmenn bókaforlaga eða annarra hagsmunaaðila.